Espacio para la poesía de todos los tiempos: poemas, autores, libros, artículos... Todo lo que tenga que ver con el bello arte de decir con la palabra...
L'escritor aragonés Ángel Guinda
convidáu d'honor de la Xunta d'Escritores Asturianos 2008
L’escritor aragonés Ángel Guinda va ser el convidáu d’honor d’esta edición de la Xunta d’Escritores Asturianos que tendrá llugar n’Uviéu na Biblioteca del Campu San Francisco los díes 2 ,3 y 4 de xineru del 2008. Ángel Guinda nació en Zaragoza el 26 d’agostu de 1948. Dende 1987 reside en Madrid. Reivindica "una poesía comprometida que seya non sólo obxetu de guapura sinón tamién suxetu de conducta, una poesía que-y sirva al ser humanu: moralmente pa vivir; estéticamente pa gozar; y culturalmente pa enanchar y afitar el so saber". La so obra ta marcada por un realismu esistencial. La so vida y poética podemos sacales d’una selección de los sos aforismos referíos al poeta y a la poesía: “La poesía sirve al individu y a la comunidá como mediu propagandísticu de guapura, verdá y llibertá”, "Ser poeta nun ye una profesión. Ser poeta ye una posesión", "Escribir como se vive", "Escribir como se ye", “Espresase ye vivir”, “La poesía sirve, la poesía ye”, "La poesía ye palabra ensin apenas palabres", "Poesía: conciencia con ciencia", “El poeta ta siempre en contra, alcontrándose frente a y cola contradicción”, “Menos divos, más poetes suversivos”. En 1977 fundó la colección Puyal de llibros de poesía, y en 1988 la revista Malvís.
Nos suplementos lliterarios de los periódicos Heraldo de Aragón, El Día, El Periódico de Aragón y en delles revistes (Turia, Cuadernos del Matemático, Poesía Por Ejemplo, Los Cuadernos del Norte ...) publicó crítica en cientos d’artículos sobre los autores clásicos y contemporáneos. La obra d’Ángel Guinda ta marcada poles principales consideraciones de la so propia poética: "La palabra ye un ser vivu", y "Escribo contra la realidá, non sobre ella". Tamos ante una poesía útil, espresionista, torturada, grave y fonda. Una poesía fía de la rebeldía y del más llúcidu pesimismu; vitalista pesie a ser un testimoniu de la convivencia del ser humanu cola muerte. Nel añu 2006 llevó alantre una fuelga de fame pa reivindiar la reconocencia d’unos compromisos culturales irrenunciables.
Malditu pa unos, exemplar pa otros. La so gueyada filosófica, el so llinguaxe depuráu, l’estrictu dramatismu, lleváronlu a esa llende na que limita la poesía col puru silenciu y a consideralu por un sector de la crítica como "unu de los poetes más necesarios y reveladores que dio la lliteratura ibérica d’estes caberes décades. Defensor de toles llingües ibériques en perfecta harmonía publicó hai poco el pimer poemariu sextillingüe del Estáu hespañol, (Tola lluz del mundu) incluyendo nél a les llingües asturiana y aragonesa.
¿Cuálu ye anguañu el to camín poéticu, la to intención lliteraria?
Callar la boca. O escribir sólo lo necesario, lo imprescindible, lo inevitable: únicamente aquello que necesitaría espresar el llector si ésti lo pudiera escribir y yo lleer. Facer realidá escrita’l compromisu qu’adquirí nel manifiestu “Poesía útil”.
¿Qué escritores o poetes son anguañu referentes pa ti o cuálos son aquellos que más aprecies pola so obra, estilu y conteníu?
Antonio Porchia, Montale, Gil de Biedma, Ángel González, José Hierro, Rosendo Tello, Gimferrer, el primer Leopoldo Mª Panero y, ente los más mozos, Aarón García, Jesús Jiménez Domínguez y Octavio Gómez Milián...
¿Cómo describiríes en breves pincelades el paisaxe actual de la poesía n’Hespaña?
La frondosa viesca de les numberosísimes publicaciones d’irregular calidá nun dexa güeyar claramente los poemes meyores de los verdaderos poetes. Ye un paisaxe de fusión y confusión, un paréntesis d’eclecticismu de tendencies: poesía de la esperiencia, de la diferencia, entrometida... Ensin que nenguna d’elles seya hexemónica pola calidá de los sos resultaos.
¿Cuála ye la to opinión sobre’l fechu d’escribir narrativa o ensayu? ¿Tien un poeta qu’algamar tamién estos xéneros o la poesía ye un mundu propiu y exclusivu?
La poesía ye un mundu mui particular, d’intensidaes, y el poeta ha tar siempre vixilante. Creo que nun ye incompatible col ensayu que tien como tema la poesía ya incluso al poeta. La narrativa yá ye otru cantar, otru contar. En cualesquier casu, el poeta ha escribirla si puede facrlo cola más alta calidá.
N’Hespaña esistieron bonos artistes del surrealismu. ¿Crees que se tien abusao d’esta tendencia na poesía y ello alloñóla del públicu?
Personalmente, el surrealismu nun m’interesó abondo nin nel arte nin na lliteratura. Los movimientos que más alloñaron al públicu de la poesía fueron el culturalismu y l’esteticismu decadente colos sos epígonos.
Con sinceridá, ¿qué opines de la “poesía de la esperiencia” de güei?
Paezme que peca d’anecdótica y superficial, de nun afondar na problemática de la condición humana hasta les últimes consecuencies. Hai que dexarse la vida en cada palabra pa que la esperiencia de la poesía nos atraviese y tresmita verdá, guapura y conocimientu a los llectores.
¿Tien inda sentíu la poesía social o comprometida col mundu real?
Por supuesto. Cuando unu repasa y padez los graves problemes del nuesu tiempu (la inmigración, los ensin-teitu, la fame, les guerres, la violencia de xéneru, la marxinación de la mocedá y de la vieyez, la degradación del mediu ambiente, la manipulación que’l poder fai del llinguaxe...) nun se tien que permanecer nel marxe; y el compromisu dende la palabra tien de ser constante y vixilante.
¿Qué podemos opinar de les grandes empreses editoriales? ¿Ye necesario rentabilizar lo cultural y lo poético pa que perviva na sociedá?
Nun nos tracamundiemos: l’oxetivu primeru de toa empresa ye ganar dineru, incrementar añu y años el volume de beneficios. El problema ye estremar, mesmo nel ámbitu estatal como nel priváu respecto a la cultura, la diferencia ente cultura politizada y política cultural. Tenemos qu’esixir una verdadera política cultural que suvencione obres lliterarias de máxima calidá ensin esixir nada a cambiu a los autores, respetando la so llibertá de creación. Toos tenemos derechu a consumir la meyor cultura posible porque toos la pagamos.
¿Por qué nun hai n’Hespaña más revistes de lliteratura como por exemplu en Francia?
Ye una custión de necesidá de mercáu. N’Hespaña hai voluntá de lleer (viéndense llibros, entámense feries que potencien l’incrementu de ventes) pero lléese poco y nun se llee bien. Un país que llee pocos llibros mal pue necesitar la edición de más revistes dedicaes a la lliteratura.
¿N’Hespaña hai que ser famosu pa que te llean o yes famosu porque te lleen?
Pocos escritores, y perpocos poetes, son famosos n’Hespaña. Hai escritores y poetes que gocien d’un merecíu reconocimientu y otros d’un inmerecíu desconocimientu. Dalguna veegada tengo dicho que nun país nel que se llee coles oreyes lo meyor ye escribir a mordigaños.
¿Crees que la lliteratura n’Hespaña ta desprestixada pol pueblu? O dicho d’otru xeitu, ¿por qué los escritores yá nun son iconos o referentes de la sociedá como sí lo fueron notres etapes?
Nun se trata de desprestixu sinon d’un determináu distanciamientu indiferente. La postmodernidá apurrió cierta desmitificación de los grandes nomes a los que, per otru llau, se los ve más próximos: y paezme mui bien. Yá yera hora de desacralizar l’oficiu d’escribir. A los escritores fáltanos un mayor compromisu social y una mayor capacidá d’acción y reacción respecto a les custiones polítiques, sociales, económiques y culturales.
¿Qué opines de los premios lliterarios, asina, en xeneral; y en particular de los que se paguen con dineru públicu? ¿Tendría qu’haber más? ¿Son en xeneral garantía de prestixu? ¿Sirven a la poesía o faen serviles a los poetes?
Yá nel mio Manifiestu Poesía y suversión, de 1980, escribía que “los premios lliterarios son un filtru del sistema pa castrar la creatividá”. Toi a favor de los premios pa los más mozos como apoyu a la so iniciación, como posibilidá pa descubrir posibles talentos lliterarios. Y toi a favor tamién d’aquellos premios que reconocen toa una trayectoria. El problema ye que los premios siguen tando mui condicionaos poles relaciones lliteraries, l’amiguismu. Falta rigor y falta independencia de criteriu nos xuraos, sobra “mamonéu”.
¿Cuálos son los criterios pa determinar a los bonos y a los malos poetes?
Máxima calidá estética, estilu personal, coherencia y cosmovisión propia. Que los sos poemes nun-y resulten indiferentes al llector o malpenes raspien la so conciencia y sensibilidá, sinón que les atraviesen.
¿Esisten les modes lliteraries?
Por supuesto, son les tendencies dominantes en cada época. Tradición ye herencia y enriquez más al que meyor sabe asimilala. El que abraza les modes envede la tradición, hereda lo efímero d’aquéllaes. Frente a les modes puntuales hai qu’escoyer el mou personal de qué dicir y cómo dicilo.
¿Qué escritores escaecíos o malditos merez la pena recuperar y alitar?
Citaré sólo a dalgunos poetes del sieglu XX: Pedro Salinas, el meyor Blas de Otero y los aragoneses Miguel Labordeta y Julio Antonio Gómez,
Tuviesti convidáu a la Clausura de la Xunta d´Escritores Asturianos 2008 n’Uviéu. ¿Qué significa Asturies pa un poeta y una persona como tu?
Como poeta, conocer personalmente a escritores que tienen obra que sigo con interés y almiración dende hai tiempu a través de la perbona revista “Lliteratura”, y relacionrme con ellos. Como persona, volver a empapame de la historia d’un pueblu lluchador y resistente asina como del maraviyosu paisaxe d’esta tierra, una bandera frente a la ermificación.
¿Qué opinión te merez la situación de la llingua asturiana , un idioma tan asemeyáu en ciertu sentíu al aragonés?
La llingua asturiana, como l’aragonés, necesita de mayor apoyu institucional, sobre too, escolar, respetu y solidaridá del pueblu y de tolos hispanohablantes. Les llingues minoritaries son un tesoru a caltener y desarrollar pa evitar el riesgu de la so extinción: la pérdiga de cualesquier llingua siempre supón una pérdiga de vida.
¿Cuála foi la idea al querer editar Tola lluz del mundu nes seis llingues hispanes?
Solidarizame poéticamente con elles. Sentir nos mios propios testos que castellanu, eusquera, catalán, asturianu, gallegu y aragonés s’abrazaben p’acoyer esos pequenos poemes d’amor.
Tags: ANGEL GUINDA